[b]الحاجة (نصيحة) من صباح بدري رمت (زلابيتها) ولفت علي بيوت الحلة...حلة حلة ...تعلن عن نتيجة ولدها التي ستكون في صباح هذا اليوم.
} الحاضر يكلم الغائب ...والعميان يجي شايل المكسر.
} الحاجة (نصيحة) ما بتعذر ليها زول ...الما بجيها في نتيجة ولدها ..قالت سلام الله ما بتديهو ليهو.
} حاجة نصيحة قال ليها ولدها (انو اشتغل كويس في الامتحانات)..اي امتحان يرجع منو بقول : (ما عندو غلطة).
} يا ود الناس انت الغلط ذاتك.
} ولد الحاجة (نصيحة) اسمو (النصيّح) تيمنا بي نصيحة جدهم الكبير الذي قال لهم : (الغريق بتعلق بي هداف الدوري).
} المهم الحاجة (نصيحة) لمت نسوان الحلة كلهن عشان يجن ويشوفن تفوق ولدها (النصيّح) ونتيجته المشرفة.
} النسوان (اترصرصن) في الحيطة متل (مشابك الغسيل).
} الجرس بتاع الطابور ضرب ...الطلبة وقوفوا في (الطابور)...الاستاذ طلع في المسرح.
} نتيجة الصف الاول ذاعوها ...والنسوان واقفات.
} نتيجة الصف الثاني ذاعوها...والنسوان واقفات.
} نتيجة الصف الثالث ذاعوها...والنسوان واقفات.
} نتيجة الصف الرابع ذاعوها...والنسوان واقفات.
} لما جاء الدور علي نتيجة الصف الخامس البقرأ فيه (النصيّح) ...الحاجة نصيحة اسعفت النسوان بي (زغرودة) عشان (يصحصحن) شوية.
} الاول ذاعوه...الثاني ذاعوه...والنسوان كل مرة يتلفتن علي الحاجة نصيحة...(نظام الحاصل شنو؟).
} الخمسة الاوائل ذاعوهم ..والنصيّح ما فيهم.
} نصيّح شنو البدخل الخمسة الاوائل.
} الحاجة نصيحة ...قالت للنسوان :اصبروا ...ما تضيقوا.
} وقت العشرة الاوائل انتهوا و (النصيّح) ماذاعوه...واحدة من النسوان وقفت و(اتشوبرت) متل (المفتاح الانجليزي) وقالت للحاجة نصيحة : انتي يا (النصيحة) وقت ولدك ما في العشرة الاوائل مصحيانا من النجمة مالك؟ ..ومتلتلانا في البرد دا ليه؟.
} الحاجة نصيحة قالت ليهن: انتوا قايلين الفرق بين العشرة الاوائل والعشرة الثواني شنو..(ثواني) بس؟...كلها تلقوها درجة وإلا درجتين...انتوا اصبروا (النصيّح) هسع ح يذيعوا.
} الاستاذ وقت قال : العشرين الطالب حمد محمد حمد ...الحاجة نصيحة من الاحراج بقت متل (فرشة المعجون) الضارباها الشمس.
} خمسة نسوان رجعن وقالن للحاجة نصيحة : بعد كدا ولدك إلا يذيعوا ليك في لجنة التطعيم ضد الجدري.
} النسوان ما خاطيات علي الحاجة نصيحة عندها ولد متل (قدحة التوم) ...من الشارع الخامس تشمو.
} الحاجة نصيحة وقت الاستاذ وصل التلاتين وولدها ما ذاعوه ..قطعت ليها (جك موية).
} الموية ذنبها شنو؟.
} واحدة من النسوان حاولت تهون عليها شوية ...قالت ليها : اكيد ولدك دا الاساتذة قاصدنوا.
} والنصيّح واقف في الطابور (متل الساعة الما شغالة) ...وسيدها بظبط في (المنبه) حقها.
} يا زول وقت الاستاذ وصل الخمسين والنصيّح ما ذاعوه ...الحاجة النصيحة قالت للنسوان...ولدي دورو قدام.
} وقت الاستاذ قال : اما الطالب النصيّح حاج التوم النصيحابي فقد كان من المتفوقين في (نطح المكبورة).
} المدرسة كلها صفقت للنصيّح وهو يقدل في حوش المدرسة عشان يستلم شهادتو.
} تقول خرجوه من كلية حربية.
} في واحدة من النسوان قالت للحاجة (نطح المكبورة) دي شنو كمان يا الحاجة نصيحة؟.
} الحاجة نصيحة ما عجبها السؤال ...قالت ليها (نطح المكبورة) دي حاجة زي (الانجليزي)...مادة جديدة دخلوها ناس ثورة التعليم العالي ديل...قالوا البتفوق في المادة دي احسن من الطالب البجي الاول.
} في نسوان طبعا الكلام المغطغط دا ما بعجبهن ..مشن سألن من (نطح الكمبورة) دي وعرفن انها حاجة زي (مبيت القوا).
} يعني باختصار شديد كدا ..(النصيّح) دا قفل (دفتر العيادة)...كل يوم شايل الدفتر وماشي للعيادة.
} اظن كدا الموضوع بقي واضح.
} الحاجة نصيحة ...دا (اعلام المريخ).
} النصيّح طبعا اخوكم في الاحمر الوهاج (كلتشي).
} تلات مجموعات افريقية ما جاب فيها قون.
} انا اول مرة اشوف لي ناس تفرحهم (الوصافة).
} انتوا وقت (الوصافة) بتفرحكم ...الدوري لزومو شنو؟.
} هداف الدوري دي لقب كل سنة ممكن نتنازل ليكم منو.
} والله فعلا (اليتيم نجمتو كبيرة)....اقصد (اليتيم لقمتو كبيرة)...اقصد (الوصيف لقمتو كبيرة).
} هسع دي حاجة بتفرح ليها زول.
} كلتشي المباراة كلها زعلان تقول لاعب ماتش اعتزالو.
} يا زول انت زعلان كدا مالك.
} تعرف الموضوع ما بستاهل.
} وناس الوصيف عاملين ليهو توم وشمار.
} انتوا عارفين حالتكم دي زي شنو؟.
} قلت ليكم الحكاية دي زي حكاية ناس (الدغيل).
} ناس الدغيل ديل كل خميس بعملوا ليهم حفلة ..وبقفلوا الشارع.
} رايحة ليهم فرحة.
} عندهم عرس بعملوا حفلة...(عادي)...عندهم زول رجع من بره بعملوا حفلة ..(عادي)...عندهم سماية بعملوا حفلة..(عادي)...اي حاجة بعلموا ليها حفلة ...نجاح ..مرور ..خروج من المستشفي...صرفة صندوق ...تعليق ستائر...تبديل ملايات.
} اي حاجة.
} دا كلو عادي.
} الما عادي ...انهم اي حفلة بعملوا ليها (كشف)..الكشف بمر عليك قبل ستة شهور من الحفلة.
} امس مشيت عليهم ..لقيت الصيوان قافل الشارع ...قلت ليهم ناس الدغيل ديل عندهم شنو (لمباتهم) للصباح مولعة.
} في واحد من الذين مر عليهم (الكشف)..قال لي : ناس الدغيل ديل عندهم سماية.
} قلت ليهو سماية شنو؟.
} قال سماية سوداني في امريكي جابوا ليهو (تلغراف) بعد عشر سنوات زواج.
} هسع ناس الوصيف جابوا ليهم (هدف).
} والله يا كلتشي مفروض يضبحوا ليك تاني ويسموك (هدف عكسي).
} غايتو الناس ديل فاضيين بشكل.
} في اسبانيا وفي نهاية اغسطس يجتمع الاسبان في كل عام ليتحاربوا بـ (الطماطم) ويتجادعوا بها في عيد اسمو (توماتينا).
} رمي الطماطم دي يستمر ساعة كاملة...الغريب ان هناك 30000سائح ياتوا من مختلف انحاء العالم للمشاركة في هذا العيد ...الذي تعمل ليهو قومة وقعدة.
} علي الطريقة نفسها مفروض ناس الوصيف ديل يعملوا ليهم مهرجان للقب هداف الدوري.
} المهرجان دا اخير ليهم من مهرجان الطوب والسيخ البعملوا لينا دا.
} اسم المهرجان (اليتيم لقمتو كبيرة).
} شروط المهرجان.
} (أ) 15 شوال خيش ...لزوم (الخدعة).
} (ب) 4 جرادل كبيرة ...(بدل الكاسات).
} (ج) 40 جلدة (سفري).
} (هـ) ملوة كلتشة مع القليل من الورغنة ...والاعلام السالب.
} (ك) يمنع اصطحاب (الكراسي) بعد الكورة.
} الهدف من المهرجان.
} بقاء اكرم ومجاهد وريتشاد في كشف المريخ.
} ملحوظة: المهرجان انتهي.
هوامش
} في مباراة القمة الاخيرة ...المريخ استحق الانتصار ...وما قدمه الهلال في الشوط الثاني لا يكفل له الانتصار.
} الحكم لم يظلم الهلال.
} رغبة المريخ وارادته في الانتصار كانت اكبر من رغبة الهلال ومن ارادته.
} ريتشارد (لسع بخيرو)...مفروض يمنحوه نجومية المباراة.
} اكرم الهادي سليم تجاوز (الخلعة) من البرد.
} ننصح اكرم الهادي سليم متابعة مهرجان الطماطم في اسبانيا فيه حاجات ممكن يستفيد منها.
} مجاهد نتمني ألا يقود المريخ في الموسم القادم كمساعد مدرب للمريخ.
} منير امبدة واحمد الفاضل اثبتا نجاح لاعب المرحلة السنية في الهلال ...طبيعي ان يصعد في التسجيلات القادمة منير امبدة...ونتمني ان يتم كذلك تصعيد النعيم رونالدينو وجعفر بركية.
} تصعيد النعيم وبركية ومنير افضل خطوة يمكن ان نعتمدها لغرفة تسجيلات الهلال في التسجيلات القادمة.
} مفروض حوافز وارغو تصرف له من الهلال.
} هل يلعب وارغو في جزيرة الفيل.
} اثر ما في ليهو في الوصيف.
} لولا هدف كلتشي العكسي لتخيلت كلتشي (لاسانا) الذي دخل في الزمن البدل الضايع.
} مطلوب من اكرم ان يقوي مهاراته في (الرقص).
} استاد المريخ مغلق للتصليحات!!.
} مباراة القمة الاخيرة لعبها الهلال بهدوء اكثر من اللازم...فغاب الحماس وضاعت الرغبة.
} مباراة كأس السودان لا تقبل غير الانتصار.
} خبر عاجل: خلوا الاتحاد العام يشوف ليكم لقب هداف كأس السودان عشان يبقوا عندكم لقبين